zpiderr on the web

Nú hefur því verið haldið fram að ég sé tölvufíkill, að ég noti tölvuna meira en góðu hófi gegnir.  Ekki nóg með að ég starfa við tölvur allan daginn heldur að ég geti ekki beðið eftir að komast í tölvuna mína þegar heim er komið.  Synir mínir tveir eru orðnir líklegir kandídatar til að feta í fótspor föður síns, sá yngri á þó enn langt í land, þökk sé móður hans.

Fyrir þá sem halda þessu fram verð ég því miður að játa að þeir hafa líklegast rétt fyrir sér.  Ótrúlegt hvað hægt er að eyða miklum tíma fyrir framan þetta rafmagnsgangverk, hvernig hægt er að nostra við að fínpússa minnið, samstyrkja (defragment) diskinn og lesa endalausar upplýsingar um fótboltann, svo ég tali nú ekki um bridge-ið. 
Konan hefur þó aldrei þurft að hringja á lögregluna, þótt hana hafi örugglega stundum langað til þess.

Þar sem opinberun mín til tölvufíknarinnar er orðin staðreynd, þá lýsi ég því hér með hátíðlega yfir í votta viðurvist að ég mun aðeins fara í tölvuna tvisvar á ári, annars vegar þegar forsetinn á afmæli og hinsvegar þegar hann á ekki afmæli.

 Þangað til næst

	Lögregla kölluð til vegna tölvunotkunar unglinga
Ábyrgðarmaður færslu Tilkynna um óviðeigandi tengingu við frétt

Senn koma jólin......en fyrst auglýsingar.
Nú getur sjálfsagt markaðsmaðurinn og auglýsingamógullinn hann Egill bróðir minn frætt fáfróðan stóra bróðir sinn um það hvort léleg auglýsing sé betri en engin auglýsing.   Helgar tilgangurinn meðalið ?  Er undirmeðvitundin það sterk að léleg auglýsing hefur áhrif á hvort maður kaupir vöruna eða ekki ?

Þær eru mjög slæmar þessar erlendu auglýsingar sem búið er að döbba á íslensku afskaplega klúðurslega, einsog flest þvottaefna auglýsingarnar.

Allavega, þá eru nokkrar alveg sérlegar slæmar íslenskar auglýsingar sem eru við það að fá mann til að vilja taka upp bazookuna og skjóta auglýsingastofuna sem gerði viðkomandi auglýsingu.

5. KFC - ansi hreint kjánalegar auglýsingar sem gjörsamlega tröllriðu öllum auglýsingatímum í kringum Rockstar, ílla leiknar og ósannfærandi, en kjúllinn er góður en ég fæ mér aldrei Zingerborgara á sunnudögum.

4.  Vaka - Er í gangi í útvarpinu þessa dagna, búið að taka Bí, bí og blaka og breyta því í Bí bí og vaka, algjör vibbi og hreinlega kjánalegur.  Smá fyndni í lokin eru þó örlítil sárabót fyrir glataða auglýsingu.

3.  Jói Fel - Held að ég fái sjaldan eins mikinn kjánahroll og þegar maður sér Jóa Fel auglýsa sjálfan sig.  Eitthvað svo glatað að sjá glottið á honum og svipinn sem sýnir að maðurinn heldur að hann sé Guð almáttugur.

2.  Ingvar Helgason.  Alger horbjóður, ætti að varða við lög að gera svona leiðinlegar auglýsingar.  Sá sem samdi þetta hefur verið á þungum lyfjum og sá sem samþykkti þetta hjá IH er sjálfsagt atvinnulaus í dag.  Ekki nóg með að taka hundleiðinlegt jólalag, heldur gerðu þeir það enn leiðinlegra, þegar þessi auglýsing kemur þá er skipt um stöð.

1.  MS - Muu muu mundu eftir mjólkinni.  Held að Fíknó ætti að leyta af ofskynjunarlyfjum uppá Bitruhálsi, þvílík hörmung.  Ætti að taka þessa auglýsingu og láta hana rúlla uppá Litla Hrauni í einangrunarklefanum, það er ef Genfarsáttmálinn myndi leyfa það.  Myndi nota djús á kornflexið mitt ef það væri ekki drullu vont.

Þangað til  næst.

	Jólaverslunin formlega hafin í Bandaríkjunum
Ábyrgðarmaður færslu Tilkynna um óviðeigandi tengingu við frétt

Djö.... hafa ekki fattað þessa snild, ég leyfi mér að segja gargandi snilld.  Gæti tekið nokkrar Ora baunadósir og sturtað safanum, sem venjulega fer í vaskinn, oní flöskur og tappað á.  Þar sem þetta yrði örugglega svo mikið succsess þá hefði verið hægt að auka við vöruúrvalið og koma með gulu bauna gos og bakaðar bauna gos.

Svona er maður ófrjór og vitlaus, að láta sér ekki detta þessi snilld í hug.  Er nokkuð viss um að sá sem sér um að koma nýjum vörum í framleiðslu hjá Jones Soda sé íslenskur, eða sá hinn sami og bjó til og framleiddi Súkkó hérna um árið, sem reyndar kolféll sem er óskiljanlegt, hver vill ekki gosdrykk með súkkulaði bragði ?

Gaman annars að rifja upp nokkrar gostegundir sem ekki hafa meikað það, sem ég man í fljótu bragði eru: Sukkó, RC-Kóla, Cherry Cola, Ískóla, Miranda, Spur, Sinalco, Póló, Vanilla coke (talandi um viðbjóð) og örugglega fullt fullt af öðrum drykkjum, athugasemdir vel þegnar.

þangað til næst,

	Drykkur með bragði af grænum baunum brátt framleiddur
Ábyrgðarmaður færslu Tilkynna um óviðeigandi tengingu við frétt

Núna má sjá auglýsingar víða þar sem hvatt er til nota ekki nagladekk, sem er gott og vel.  Slagorðið er „Minnkum svifryk“ og ég spyr er rétt að minnka svifrykin ? Er ekki betra að fækka þeim ?  Fer það kannski betur með öndunarfærin okkar að anda að okkur minni einingum af svifryki.  Nú er ég engin íslenskufræðingur, langt frá því, en eitthvað finnst mér þetta ekki vera rétt.
Ein fyndasta auglýsingin var þegar var verið að auglýsa einhverja samkeppni, og þar kom þessi ódauðlega klausa „.... ekki verður lógóið notað nema að höfðu samræði við höfund.... “

Annars eru fyrirsagnir oft á tíðum ansi skrautlegar,  frægust er nú sjálfsagt „Skreið til Nígeríu fyrir milljón“ man líka eftir einni í Fjarðarpóstinum „Einn fimmti Hafnfirðinga ekki ruglaðir“ og var þá vísað til þess að um 20% Hafnfirðinga ættu myndlykil.

DV voru nú líka ansi lunknir í að koma með undarlegar fyrirsagnir, a la Eiríkur Jóns.  Ef einhver man einhverja skondna þá endilega að koma með hana í athugasemdunum.

Bresku blöðin eru snillingar í að afbaka texta og gera úr honum fyrirsagnir, dæmi eru t.d.
„I Can Raise The Ti-toon-ic Says Glenn Roeder“ - The People
„Sparky Hope For Beckburn Coup“ - The Sun

Þangað til næst,
zpiderr